Payaam Aaye Hain Us Yaar-e-Bewafa K Mujhe

Ads go here

Payaam Aaye Hain Us Yaar-e-Bewafa K Mujhe
Jisay Qaraar Na Aaya Kahin Bhula K Mujhe,

Judayian Hon To Aisi K Umer Bhar Na Milain
Faraib Do To Zara Silsilay Barha K Mujhe,

Nashay Se Kam To Nahi Yaad-e-Yaar Ka Aalam
K Le Urra Hai Koi Dosh Per Hawa K Mujhe,

Mein Khud Ko Bhool Chuka Tha Magar Jahan Waalay
Udaas Chorh Gaye Aaina Dikha K Mujhe,

Tumharay Baam Se Ab Kam Nahi Rifat-e-Daar
Jo Dekhna Ho To Dekho Nazar Utha K Mujhe,

Khinchi Hui Hai Mere Aansuon Mein Ek Tasveer
Faraz! Dekh Raha Hai Wo Muskura K Mujhe.

Ads go here