Hawa ki zad mein jo aa gaye the wo aashiyane bikhartay dekhay

Ads go here
Hawa ki zad mein jo aa gaye the wo aashiyane bikhartay dekhay
Kahin pe auraq reza reza kahin pe alfaaz martay dekhay

Yoon raz-e-hasti samajh mein aya fasana jaan ka silsala bhi
Jo khasta peron ki tehniyon se khizan mein pattay bichartay dekhay

Guzaar do zabt ki sabeelon pe shiddat e gham ki talkhiyon ko
Ye zakham kya waqt ke saharon pe sookhay darya bhi bhartay dekhay

Tumhara mera to silsala bas zara si muddat ka silsala hai
Wo log kesay the jo mohabbat mein had se aagay guzartay dekhay

Ye qismaton ka fatoor hai jo azal se thehra hua hai ab tak
Hein sabza zaaron mein pair aisay k jin se panchhi bhi dartay dekhay

Teray badalnay pe kya gila jab mujhay kabhi tum milay nahin ho
Main ne sar-e-dhoop rah mein aksar badan se saaye bichartay dekhay

Ye saal-e-no phir aziyaton ka piyam laya hai meray ghar mein
Ke raat kamray ki seehriyon pe jo main ne saaye utartay dekhay

Khuda karay khair ho Aqeel! ab main jag betha hoon jis se dar kar
Wo khawab kya tha keh aag ki zad mein shehr saray jaltay dekhay.
Ads go here